恒生MPower卡喺5月31號正式Rebrand做MMPower卡（點讀呢其實？），雖然市場上好似未有太多人報道，不過細心一望，我就發現呢張卡相當有意思，甚至係恒生近年喺信用卡業務上一個相當大嘅改變，令我心入面不禁高呼一句：「M 仔卡」要進化做「M佬卡」喇！

M佬卡會分2篇慢慢講，上集先從兩個角度講吓M佬卡有意思嘅地方：

恒生第一次玩自選類別，向滙豐最紅獎賞致敬嗎？
門檻低、天花高、範圍闊、回贈多，呢間真係恒生銀行？

下集會將M佬卡同市場上幾個主要對手比較一下，睇吓到底呢個Reward package 喺市場上幾有競爭力呢？一齊同大家分析吓。

最新銀行及金融職位空缺：https://bit.ly/43zCyyi

恒生第一次玩自選類別，向滙豐最紅自主獎賞致敬嗎？
要數信用卡自選類別嘅代表，現時香港市場上嘅佼佼者當然係滙豐嘅「最紅自主獎賞」（Red Hot Rewards），滙豐信用卡客戶可以喺「賞滋味」、「賞世界」、「賞生活」、「賞家居」、「賞品味」5大類別（以前仲有個「賞中華」，而家合併咗入「賞世界」啦），分配額外5X獎賞獎（即係2%回贈）。

如果大家推晒5X落去「賞滋味」，又係用滙豐Visa Signature，咁就會有本身1X +VS 3X +賞滋味5X = 9X = 3.6%回贈，呢刻基本上係市場食飯回贈嘅High watermark，再配合1 RC換10 Asiamiles = $2.778 / mile，仲完勝埋Cathay卡嘅$4 / mile啦。

咁呢種玩法都唔完全係滙豐原創嘅，呢種「自選」嘅玩法早喺2009年大新已經玩緊，張卡叫「我至愛商戶」，不過張卡玩唔夠5年已經無咗（可能皮費太貴，細銀行唔易做喇）。以前都有寫過，有興趣可以睇返：銀行閑談 (119) — 從 DBS Live Fresh 到 DSB 我至愛商戶談「自選回贈」

咁恒生就一路都無呢種玩法的，M佬卡應該係第一次，客戶可以喺下列5大類別自選2款享有5.4%回贈，大手筆喎！

手機支付
餐飲（所有食府堂食及外賣簽賬）
旅遊及外幣簽賬（酒店、航空公司、旅行社等）
電子產品
娛樂（影視及音樂串流平台、全港戲院、本地主題公園、Cityline購票通平台之簽賬等）

望返呢5個類喇同滙豐嘅Red Hot Rewards都有啲類似，餐飲對「賞滋味」、旅遊外幣對「賞世界」、電子產品對「賞家居」，當然各自Coverage有啲唔同，例如「賞家居」就包超級市場但係M佬卡就無喇。

不過M佬卡嘅自選類別一樣有Red Hot Rewards包唔到嘅項目，就係可以揀「手機支付」！咁就屈機了，即係只有大家揀「手機支付」，百佳惠康、日本城、戲院、百老滙、麥當勞、巴士都包，回贈率係5% + 基本0.4% = 5.4%，要完美碾壓Red Hot Rewards了……

最新銀行及金融職位空缺：https://bit.ly/43zCyyi

門檻低、天花高、範圍闊、回贈多，呢間真係恒生銀行？
我以前曾經唔止一次用「小家」嚟形容過M仔卡，畀大家睇睇2019年M仔卡嘅玩法。

當年M仔卡標榜自己本地餐飲4.4%回贈，不過一定要用流動支付，即係如果你要去Ritz Carlton請屋企人食自助餐你就唔使諗（可以畀我埋去Counter拍手機嗎？)。

當年M仔卡亦有標榜網購4.4%回贈，不過只限只限淘寶、iTunes同Google Play，淘寶就要畀1.95%外幣交易手續費，而iTunes同Google Play你又使到幾多錢呢？

再衰啲嘅係，佢要(1)要每個月消費滿$3,000、(2)個回贈上限計算超複雜，睇到我頭暈，大概結論係頭2個Category每月消費滿$3,000就一定會Hit the ceiling，話佢係門檻高、天花低、範圍窄我覺得唔係誇張的。

之後M仔卡有小幅度修改，簡化咗少少玩法，網購唔再侷限淘寶、iTunes、Google Play，回贈亦推高到5%，不過仍然要每月最低消費$3,000、回贈上限仍然極低（Mobile payment $100、海外同網上各自$200）、網購要每張單夠$300先有資格攞Extra rebate，好難玩呀！

相反M佬卡就有氣勢得多咯！

每月簽賬下限：無！
每筆簽賬下限：無！
回贈上限：所有類別合併計算每月$800，即係一個月$16,000至$17,391簽賬上限
網購回贈：5%！自選類別回贈：4%！

單睇呢個Package，可以話係門檻低、天花高、範圍闊、回贈多，可以同滙豐Visa Signature同Red Card 爭一日之長短了。

當然Ceiling夠唔夠高就好睇人嘅，如果你一個月卡數係$16,000以內（我相信大部份香港人都係啦），咁呢張卡個Ceiling就已經足夠高喇。

至於範圍方面，我諗喺原生網購+自選手機支付+餐飲，個範圍可能會比Red Hot Rewards更闊，對我嚟講5%網購（+上限每月$17,391）足以碾壓Red Card，恒生今次係相當有決心啦。

M佬卡到底喺市場上幾有競爭力呢？
下篇會繼續講吓M佬卡，分析吓佢喺市場上面嘅競爭力。

先講結論，單睇Card Offer的話，M佬卡的確非常有競爭力，尤其是面對住滙豐 VS同Red Card，可以話係「你無嘅我有、你有嘅我更好」，但係退後一步睇，望返整個Credit Card配套同生態系統，恒生同滙豐仍然有相當大嘅距離，呢個亦唔係一時三刻可以追到嘅領域。

下期同大家繼續講 Credit Card。

華田銀行 FB: facebook.com/WatinResearch
華田銀行 IG: https://www.instagram.com/bank_of_watin/

最新銀行及金融職位空缺：https://bit.ly/43zCyyi

以上內容及資料僅屬個別作者的個人意見，並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。

恒生M佬卡的進化（上） — 門檻低、天花高、範圍闊、回贈多，呢間真係恒生銀行？ - CTgoodjobs Banking & Finance Channel - Columnist 專欄網誌