恭喜發財！華田銀行仝人祝各位兔年進步、身體健康！上年年廿九盤點咗各大銀行 / 電子錢包「虎年 WhatsApp Sticker」人氣榜，今年再接再厲出一個「兔年WhatsApp Sticker人氣榜」，一對比先發現原來唔係間間銀行或電子錢包都會年年農曆新年都會出Sticker的！

上年 17 間銀行或電子錢包之中，今年無再出農曆新年WhatsApp Sticker嘅有5間包括：AlipayHK、WeChat Pay、WeLab Bank、交通銀行、招商永隆；有繼續出嘅11間就包括 Citibank、中銀、東亞、中信、大新、DBS、livi、八達通、華僑永亨、滙豐、建行；接力今年推出嘅有3間包括：富邦、恒生、天星。而ZA Bank就無再喺whatsticker.online上架，而要直接喺ZA App下載，咁睇唔到下載數我就唔數佢喇。

最新銀行及金融職位空缺：https://bit.ly/40o7hgC

大家又估唔估到邊間最受歡迎呢？同上年一樣，先數中間既第12至第4名，頭三甲同尾三甲留返最後先同大家數榜啦！

第12位 — 八達通 x Onion Peterman: 兔年大Phone收
上年排名第2嘅八達通極速滑落至第12位，截至年初四收獲8,515次下載，同上年超過53,000次下載相差咗超過5倍吖！一樣都係玩 crossover，上年同癲噹 dindong合作，今年就同Onion Peterman，不過crossover對象嘅人氣就直接反映咗喺下載數嗰度喇！

第11位 — livi bank 兔年 Mochi 貼圖包
上年第9位嘅livi今年下滑2位至第11位，不過下載數係有進步嘅！由大約12,000次上升至16,560次（今年競爭激烈喎），今次直接用佢哋自家吉祥物Mochi做Sticker，亦係人氣上升嘅原因之一喇！

第10位 — OCBC 2023 Year of the Rabbit
原來上年我數漏咗OCBC！睇番上年下載數，OCBC大概排名10–11名，即係排名同今年差唔多，不過今年下載數就升咗幾倍去到超過16,000次，咁一對比就知今年嗰啲靚好多，多咗人下載都係畀心機嘅成果。

第9位 — DBS 2023兔年新春Stickers
今年DBS就失色咗喇，由上年第5位下滑至第9位，今年分咗「動態版」同「非動態版」，下載數加埋大約23,000次，比上年年廿九嘅35,000次下跌唔少。今年保持沿用多年嘅男女公仔組合（利是封用咗呢兩個公仔好耐咯），動態sticker亦有增無減，睇嚟係marketing上面功夫唔夠喇。

第8位 — 富邦銀行2023新春Sticker
首次參戰嘅富邦打出漂亮一仗，憑住8隻唔多似兔仔嘅sticker收獲超過32,500次下載，進佔排行榜中游位置！其實… 呢幾隻應該係老鼠吧？

第7位 — 大新賀年兔
大新慘遭滑鐵盧！大家記唔記得上年冠軍係邊個？係「大新財神」呀！年廿九收獲71,000次下載，過年後更衝上超過90,000次下載！但係今年一將財神換成兔仔，下載數就回落至「只得」33,000次，以500次壓過富邦以第7名衝線，睇嚟都要重新召喚大新財神至得喇！

第6位 — inMotion兔年新春貼圖
其實第4–8位都非常接近，截稿之時第5第6位更相差少於40次！今年中信繼續用太空人X大富翁做主題，今次增加多咗一啲生肖元素，對比上年老虎仔都無隻，今年節日氣氛好啲喇。年初四「inMotion兔年新春貼圖」收獲35,852次下載，名次微升一級第6位。

最新銀行及金融職位空缺：https://bit.ly/40o7hgC

第5位 — 2023兔年中銀香港BOCHK祝福貼紙包
雖然只係出咗4日（即係年三十先出），但呢個中銀 X Miffy 嘅Sticker已經收獲35,889次下載，以少於40次壓過中信進佔第5位！Miffy今年當然紅，我見成個太古城都係Miffy裝飾品，等咗足足12年到你威返次喇！

第4位 — 東亞銀行 2023 農曆新年貼圖
繼續做4哥！雖然「東亞銀行2023 農曆新年貼圖」下載數比唔上上年「東亞銀行2022 農曆新年貼圖」，Sticker亦唔多靚（個人觀感，你覺得靚嘅無所謂），不過亦以超過36,000次驚險保持4哥位置，下年真係要畀啲心機再做好啲喇。

頭尾第3位！HSBC香港滙豐銀行新春Sticker vs. 建行(亞洲)【福兔賀歲】新春貼圖包
呢個對決應該幾容易估，滙豐 vs. 建行，當然係滙豐壓倒性佔優啦！年初四季冠「HSBC 香港滙豐銀行新春Sticker」收獲超過75,000次下載，係尾三「建行(亞洲)【福兔賀歲】新春貼圖包」4,008次嘅足足18倍！

不過滙豐都唔好笑人，滙豐上年只得大約6,800次下載，我估死因之一應該係「出得太遲」，我記得上年年廿九截稿我有認真search過一次滙豐sticker，結果係「搵唔到」！即係過咗年先出咯。而建行嘅sticker繼續唔多靚，上年排第10名，今年再退3級至第13，下年會唔會退出唔玩咁呢？

頭尾第2位！中銀香港祝您兔年行大運 vs. 恒生銀行 — 財神新春賀年系列
呢個牌面上要估吓喇，中銀 vs. 恒生，邊個會係大贏家、邊個又係大輸家呢？答案係 Sticker 質量決定一切咯。

兔年年初四亞軍「中銀香港祝您兔年行大運」收獲78,531次下載，尾二「恒生銀行 — 財神新春賀年系列」年初四收獲3,330次下載，兩者相差超過22倍！中銀亦由上年第8位躍升至本年度亞軍，恭喜晒！我諗贏嘅原因真係好簡單，一個靚、一個唔靚，一個有兔年氣氛、一個無兔年氣氛，一個可愛、一個好悶，就係咁簡單咯。

頭尾第 1 位！Citi x 張敬軒 x Dear me, 新年限定Stickers vs. 天星銀行TIN仔兔年新春貼圖
最後一個對決一啲懸念都無，當然係有張敬軒加持嘅Citibank輾壓初試啼聲嘅VB新晉天星銀行啦！兔年年初四冠軍「Citi x 張敬軒 x Dear me, 新年限定Stickers」收獲297,473次下載，而包尾嘅「天星銀行TIN仔兔年新春貼圖」就只得到2,316次下載，兩者相差100倍之多喇！

Citi今年策略非常成功，對比虎年出嘅黎明 X 張敬軒Sticker最後都只係收獲55,000次下載以第3名衝線；反而今年單拖出張敬軒就有破紀錄近300,000次下載並以完全制霸婆態勝出，至叻係你喇！

天星都唔需要太灰心嘅，對手出軒公喎，你TIN仔係邊位先？有2,300次下載唔錯架喇，上年尾二WeLab Bank X BabyJohn都只係得少於2,000次下載，更唔好講包尾嘅交通銀行只得3位數字下載，所以第一次玩就有2,300次好唔錯架喇。再接再厲，下年要繼續玩哦！

各國終於通返關，希望兔年去多啲旅行，我2月又打算去日本喇，希望大家都動如脫兔，想去邊就去邊喇。

最新銀行及金融職位空缺：https://bit.ly/40o7hgC

華田銀行 FB: facebook.com/WatinResearch
華田銀行 IG: https://www.instagram.com/bank_of_watin/

以上內容及資料僅屬個別作者的個人意見，並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。

兔年WhatsApp Sticker 邊間銀行最受歡迎呢！？ - CTgoodjobs Banking & Finance Channel - Columnist 專欄網誌