早個星期去咗東京，喺銀座見同地鐵站都見到sell緊呢張卡。雖然我知好多網友日文都比我好，我都超譯一吓上面嘅文字啦：Mastercard Black Diamond，搭載天然鑽石，究極之信用卡誕生，<日本首張直身金屬卡>。

又luxury又鑽石，好似好豪咁喎。咁等緊食炸豬扒嗰陣，我就好好奇咁諗咗幾個問題，包括：

呢張「日本初の縦型金属製カード」會唔會係「日本初の縦型カード」或者「日本初の金属製カード」呢？
發行商Luxury Card又是什麼東東呢？
既然咁“Luxury”咁優惠回贈又有幾著數呢？

一齊同大家分享吓啦！

呢張「日本初の縦型金属製カード」又會唔會係「日本初の縦型カード」呢或者「日本初の金属製カード」呢？
呢張Mastercard Black Diamond號稱自己係日本首張「直身金屬卡」，咁佢又係咪日本首張「直身卡」又或者係日本首張「金屬卡」呢？答案係：NO。日本嘅直身卡都唔少，隨便google都會搵到“JAL Global Wallet Card”、“Likeme♡by saison card”（真係有個♡喺中間的…）同“APLUS CARD with”。

而日本首張金屬卡，就要數呢間Luxury Card（原來係一間公司嚟嘅，下段會講）嘅最大競爭對手American Express嘅 Centurion Card（アメックスセンチュリオン）。所以大家話Positioning幾咁重要，世人只會記得第一而唔會記得第二，既然爭唔到第一，就set多啲框架同限制出嚟，務求令到自己做到第一為止！

例如大家都知世上第一高峰係Mount Everest，足足有8848米咁高，咁第二高嘅山峰呢？大部分人都講唔出，但係我問大家香港最高嘅山呢？可能有一半人講到大帽山（另一半人會講太平山或者鳳凰山），不過大帽山其實只有957米，喺地俵上係完全唔入流的，不過唔重要，因為佢係「香港最高」，世界又與我何干？日本首張「直身金屬卡」，好啦，你贏啦！

最新銀行及金融職位空缺：https://bit.ly/40df3cr

發行商Luxury Card又是什麼東東呢？
因為呢間名為「Luxury Card」嘅公司喺香港無業務，所以我都係第一次認識佢。睇返維基原來都幾有趣，我超譯幾段。

Luxury Card由一間名為Black Card LLC嘅公司創立，首張卡喺2008年發行。Luxury Card喺2009年喺美國成功將“Black Card”作為商標註冊，其後American Express發起訴訟，指“Black Card”呢個名同其下旗艦卡 Centurion Card 相似，因為Centurion Card被坊間一般叫做“Black Card”（華田註：哇，咁都有得告！)然後打咗一大輪官司，去到2011年尾，AE贏咗（再註：哇，美國人真難明白），Black Card LLC需要除去“Black Card”嘅商標註冊，即係“Black Card”呢個 term唔再係Black Card LLC所獨享。再去到2014年尾，Black Card LLC索性將自己公司名改埋做“Luxury Card TM，再喺2017年同2018年分別進軍日本同中國大陸。

即係Luxury Card其實係一間Card Issuer，定位上係同AE Centurion Card對著幹。睇返官網，Luxury Card提供3種卡種，由低級至高級分別係Mastercard Titanium Card、Mastercard Black Card同Mastercard Gold Card，分別除咗係優惠同年費之外呢，仲有卡嘅物料都有唔同，例如金卡就報稱用24K純金製造，係名副其實嘅金卡喇。咁當然羊毛出自羊身上，喺美國要申請呢張金卡就要$995美金年費，即係$7,800港紙啦，如果喺日本就要220,000 yen一年，即係大約$13,000港紙，要靠啲優惠同回贈嚟賺番個年費係非常困難的，有關回贈優惠嘅嘢下段再講多少少。之於喺銀座見到嘅鑽石卡呢，官網就無寫要幾錢一年，剩係寫咗卡面粒鑽石係真嘅，仲要係人手一粒一粒小心翼翼地裝上去，至於申請方式係「完全招待制」，「有興趣人士麻煩申請咗金卡先」喇。

最新銀行及金融職位空缺：https://bit.ly/40df3cr

既然咁“Luxury”咁優惠回贈又有幾著數呢？
作為一張高端嘅信用卡，呢張Luxury卡當然有齊大家expect嘅嘢，包括基本回贈、24小時真人接聽熱線、Dining offer、travel offer、Lifestyle offer、旅遊保險、交通意外保險等等。由於官網並無列出鑽石卡嘅優惠詳情，我就以金卡做個例子介紹多少少，不過事先聲明，以香港人嘅眼光睇，啲優惠會令大家好失望，因為香港啲offer實在正太多。

重要嘅內容要先講，一齊睇吓金卡product page開頭sell咩先：

大家可以見到金卡個ポイントプログラム（Point Program）主打キャッシュバック（Cash Back）同マイレージ（Milage）兩種玩法。

先講Cash Back，Cash Back Ratio係「業界最高水準」嘅1.5%，咁大家就知香港信用卡市場有幾捲，渣打Simply Cash劃一1.5%、花旗Cash Back食飯 2%、滙豐 Red Card網購4%、VS自選類別3.6%，呢個「業界最高水準」嘅1.5%喺香港人眼中唔入流啦。睇返官網都幾可愛的，喺呢個point program下面佢仲整咗個calculator畀大家，default「月間お支払い金額」係500,000 yen（大約30,000港紙啦），咁個全年cash back就會有90,000 yen。大家仲記唔記得年費幾多？係220,000 yen，即係話呢張卡嘅定位從來都無諗過你可以用回贈嚟支持個年費的。香港其實喺世界上算係特例，高端信用卡要畀年費係世界嘅慣例，偏偏香港完全唔係呢回事，捲嘅程度令AE都要屈服咯。

至於換miles呢，個conversion ratio喺香港人眼中都係完全唔吸引的。睇返上面張圖，金卡每10,000 yen消費可以換到90 miles，用日yen六算計，即係大約每$600港紙消費換90 miles，即係$6.67 / mile，用五五算就係 $6.11 / mile。咁大家有玩開miles都會知道，渣打Cathay Card基本轉換率係$6 / mile，食飯網購海外係$4 / mile，如果用滙豐Red Card網購再轉miles就係 $2.5 / mile，所以話只要你用no brainer嘅渣打Cathay Card就已經完勝呢張要220,000 yen年費嘅金卡，更唔好講其他更刁鑽嘅玩法喇！

當然呢個都係市場問題啦，睇返日本JAL Card嘅rewards scheme，基本回贈係200yen / mile，即係$12港紙 / mile。如果大家肯畀3,300 yen年費（即係大概$200港紙），就可以將conversion rate X2，變成100 yen / mile即係$6 港紙 / mile，咁就貼近返香港水平。不過佢亦有combo可以玩的，就係畀年費可以X2，去特選商戶亦可以X2，咁就2 X 2 = 4，變成$3 港紙 / mile。特選商戶入面香港人比較熟悉嘅有JAL、大丸、AEON、Family Mart，都唔太難用的。

返返嚟張Luxury Card，基本回贈以外，嗰啲24小時真人接聽熱線、Dining offer、travel offer、Lifestyle offer其實都無太多詳情，所以單從官網睇就真係唔太吸引，唯一實在嘅就係一個月有3張電影戲飛，適用於3大院線（TOHOシネマズ、イオンシネマ、ユナイテッド・シネマ），同埋全年免費1+1參觀全國 7 個國立美術館。咁以$100港紙一張戲飛計，每月3張即係全年賺番$3,600一年。香港就好似無一張信用卡玩緊免費戲飛，最多都係特定院線買一送一。不過都係無得直接比較，人哋要收年費，香港就收唔到年費，好難比較喇。

只能夠講香港嘅信用卡優惠真係世一喇！3月會繼續寫吓日本其他有趣嘅信用卡，有興趣嘅就多多留意喇。

華田銀行 FB: facebook.com/WatinResearch
華田銀行 IG: https://www.instagram.com/bank_of_watin/

最新銀行及金融職位空缺：https://bit.ly/40df3cr

以上內容及資料僅屬個別作者的個人意見，並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。

日本Mastercard Black Diamond—只能說香港嘅信用卡優惠真係世一咯 - CTgoodjobs Banking & Finance Channel - Columnist 專欄網誌