上期介紹咗一般商業銀行有邊幾大部門，大致可以分成Business同Support兩大陣營，而Business又可以分為個人銀行、商業銀行、財資市場3大部分。今期會收窄一啲睇吓「個人銀行」有邊4大類別。

我諗大家隨口都可以講到好幾個部門名，甚麼存款部、貸款部、分行、Call centre等等（同Rap生菜、西洋菜、芥菜一樣咁易啦），不過咁樣Rap法就比較難好完整咁講晒整個「個人銀行」嘅架構。

其實記住以下呢個「特選客戶定期存款推廣」嘅例子，就可以一口氣講晒整個「個人銀行」嘅4大部門喇！

個人銀行部門4大類別
個人銀行嘅部門可以分成4大類，分別係：

客層管理（Segment Management，又稱Customer Proposition）
產品管理（Product Management）
分銷管理（Channel Management）
業務支援（Business Support）

當然間間銀行對呢4大部門嘅名同各自組合都唔同，但係Concept上都唔差唔幾啦。

以下面滙豐呢個「港元新資金定期存款優惠年利率—網上優惠」做一個例子，就可以一起過見到晒呢4大部門各自嘅功能喇。

最新銀行及金融職位空缺：https://bit.ly/4556Av2

特選客戶定期存款推廣 — 一個推廣、4個部門
首先同大家睇睇呢個喺 2023年4月15號滙豐官網上面搵到嘅優惠，「卓越理財」同「One」客戶經網上開立港元定期存款，3、6、12 個月都有利率優惠，最低門檻$10,000 港元。

呢個簡單嘅推廣，就已經牽涉4種唔同嘅工作：

「卓越理財客戶」可以比「One客戶」多2%利息，邊個部門負責整體統籌呢兩類客人喺銀行嘅整體體驗呢？
「定期存款」作為一個產品當然需要有部門去管理，出到乜嘢息口可以有效搶到存款但銀行又唔會太肉痛呢？
有對待（付）客人嘅整體策略，亦有產品等待佢哋幫襯，下一步就係要有銷售網絡畀產品上架。要享受呢個「網上優惠」，大家就必須要用e-banking呢個銷售渠道喇。
最後就係其他一切支援部門，包括Marketing負責落廣告、整唔同宣傳品，亦包括Data analytics負責實況報告整個宣傳成效，無咗佢哋都成唔到事喇！

以上第一種工作就係「客層管理」部門嘅工作範圍，佢哋工作上除咗喺呢啲定期存款優惠上加把咀之外，最重要係就住客人對銀行嘅價值，牽頭Product同Channel 部門打造合適嘅「銀行體驗」同「價值主張」畀佢哋（講到好好聽咁，即係你幫我搵到錢，我畀多啲方便同Priviledge你咁咯）。

如果用打仗做比喻，就係負責統籌整體戰略嘅機構，我哋應該打咩戰場、用咩武器配合咁咯。（雖然實際上好多時都係上有上「制訂」，下有下「執行」嘅……）

第二種工作就係「產品管理」部門嘅工作範圍，除咗日常管理之外，佢哋仲要肩負產品開發嘅責任，即係出一張新嘅信用卡、新嘅按揭計劃、新嘅存款方式等等，視乎你做嘅係咩「產品」喇。

如果用打仗做比喻，就係負責提供、更新、開發武器嘅機構（雖然實際上好多時都係我理你想打海戰定陸戰，我係只負責整飛機嘅，我就梗係只會專心整飛機然後叫前線打空戰啦……）

第三種工作就係「分銷管理」部門嘅工作範圍，即係Digital banking、分行、Call Centre、Mobile Sales等等真正接觸客人嘅渠道。

如果用打仗做比喻，就係真正嘅戰場所在，你畀武器我，我就負責上陣殺敵咯。（至於將在外軍命會唔會有所不受，你話呢？）

第四種工作就係「業務支援」部門嘅工作，呢啲部門可能直接Under個人銀行，亦可能係Under獨立於個人銀行嘅大Services部門，例如大銀行一般都將Marketing 獨立抽出嚟，同時支援個人銀行、商業銀行、財資市場3大部門，架構上間間銀行都有啲唔同喇。

最新銀行及金融職位空缺：https://bit.ly/4556Av2

個人銀行部門4大類別，下次聽到人做Personal banking，就識得問佢做咩喇！
今次好粗淺咁介紹咗個人銀行4大部門類別，特別想講返佢哋嘅旗下部門數量同各自人數一般都非常唔對等的，「客層管理」旗下部門最少人亦最少，「分銷管理」一般就係分行、e-banking、Call centre 3大塊，但人數就極多，大家諗吓分行幾多人就知，仲未計大家望唔到嘅Call centre哥哥姐姐呢。

雖然間間銀行部門嘅架構都唔同，不過就個人銀行嚟講，理論上就係Segment、Product、Channel、Support 4大部分喇！

下次識到新朋友話做Personal banking，喺問佢係咪做分行（同識唔識數錢）之前，不妨問吓佢係做Segment、Product、Channel定係其他Support部門喇！

華田銀行 FB: facebook.com/WatinResearch
華田銀行 IG: https://www.instagram.com/bank_of_watin/

最新銀行及金融職位空缺：https://bit.ly/4556Av2

以上內容及資料僅屬個別作者的個人意見，並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。

個人銀行部門有邊4大類別呢？ - CTgoodjobs Banking & Finance Channel - Columnist 專欄網誌