好快3年過去，各間Virtual bank陸續慶祝3歲生日。喺盈利仍然有啲遙遠之際，螞蟻集團傳出考慮出售香港虛銀股份，雖然未係完全拍手離場，不過都係一個大警號啦。

其實早喺2個月前，行內已經有小道消息話螞蟻想「交還牌照」畀金管局，到底係純屬謠言，定係螞蟻自己改變主意，定係金管根本唔准（3年都未到，咁快話唔玩！？），就真係只有管理層先知。

好多報道都有講虛銀2022年嘅虧損情況，下面呢個HKET整嘅表都幾一目了然，8間都錄得淨利息收入（真係做都做畀你），不過仍然錄得虧損，第一名係livi一年蝕咗7.15億，跟住嘅係Mox、Fusion、ZA同Welab。最有望可以錄得盈利嘅PAOB仍然要蝕1.57億，以0.94億淨利息收入計，即係翻多一倍都仲未有盈利，唔容易吖。

幾年前金管推虛銀牌照嘅時候，坊間就有種講法話香港最細嗰幾間銀行一年都有10億8億盈利，虛銀喺香港應該有市場空間。

先唔論以上理論有幾啱（or錯），3年過去，到底虛銀同傳統銀行距離有幾遠呢？今期會攞（比較大嘅）Mox同（比較細嘅）大新 — 分 (1) 利息收人同 (2) 支出兩個方向同大家一齊比較吓，結果可能會比大家想像中差得更多。

（點解唔比較埋非利息收入？虛銀而家都未棟起晒啲Fee income business，比嚟無意思啦。）

存款量同貸款量相差幾遠呢？
銀行嘅Bread and butter當然係存貸業務，兩邊都足夠大先撐得起其他固定支出啦。睇返年報，Mox存款量有83.7億，貸款量有49.6億，貸存比率係60%，淨利息收入係1.14億。

咁稅前盈利不足20億嘅大新（好少架渣，Mox一年都蝕6.3億啦），佢嘅存貸量係Mox嘅幾多倍呢？大新2022年底存款量有2,000億（Mox 24倍），貸款量（唔計Trade bills）有1,365億（Mox 27.5倍），貸存比率係68%，淨利息收入係43.8億（Mox 38.4倍）。

大家感受到個Size差幾遠，而 (1) 呢間只係大新；(2) 大新一年稅前只賺20億，就算唔計佢今年重慶銀行減值，大新個Operating profit before gains and losses on certain investments and fixed assets（當佢核心盈利啦）都只係30億，所以話一眾虛銀仲要吸多好多好多存款同貸款先得咯。

最新銀行及金融職位空缺：https://bit.ly/41XmQLD

支出又相差幾遠呢？
銀行細，支出當然應該要細（啲）。Mox上年Operating expense（唔計Credit impairment）係6.9億，其中Staff cost係2.3億，Premises and equipment（包括折舊）係1.2億，其他（包括Professional fees、Computer cost、Marketing cost）係3.4億。

大新存貸量係Mox 24–27倍，咁Operating expense又係幾多倍呢？10倍？5倍？都太多，只係4倍多少少。大新Staff cost係19.3億（Mox 8.4倍左右）、Premises and equipment（包括折舊）大約63億（Mox 50倍左右，不過人哋有 40+間舖喎！）、其他雜項係3.4億左右（同Mox差唔多）。

呢個亦反映咗一個赤裸裸嘅事實，就係虛銀的確成本會低啲，不過只反映喺舖租上面，喺存貸量只及大新1/25嘅時候，出糧竟然係大新1/8咁多，唔好忘記人哋有40+間分行同事出緊糧喎！

當然呢個唔係Mox嘅錯，事實係銀行細好多但高層唔會少好多，而越細嘅銀行出手反而要越高，如果唔係邊個肯嚟同你開荒打天下呢？

3年過去，虛銀同傳統銀行嘅距離仲有幾遠呢？
3年就快過去（遲開嗰幾間未到3年嘅），仲未有虛銀達到收支平衡，的確係有少少失望嘅。從零售客戶上客數字嚟睇，龍頭兩間其實已經可以同傳統細行媲美，但打開報表細睇實際盈利能力就知其實仲差好遠。而支出呢？除咗舖租之外，唔係大家想像中差咁多的呢。

補充少少，大家都明白一眾虛銀嘅企業銀行生意仍然係非常起步嘅階段，攞佢哋嚟同已經Run咗幾十年嘅傳統銀行比較，係一隻手鬥兩隻手，唔太公平。不過大新仍然係一個好例子，大新基本上就係一間零售銀行，個人銀行對比企業銀行嘅淨利息收入係1.6倍、非利息收入係11倍、營運支出係3.6倍，就算將大新所有數字打對折，一眾虛銀喺規模上仍然同傳統細行差好多喇。

華田銀行 FB: facebook.com/WatinResearch
華田銀行 IG: https://www.instagram.com/bank_of_watin/

最新銀行及金融職位空缺：https://bit.ly/41XmQLD

以上內容及資料僅屬個別作者的個人意見，並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。

3年過去，虛銀同傳統銀行嘅距離仲有幾遠呢？ - CTgoodjobs Banking & Finance Channel - Columnist 專欄網誌